Gagauz dilindӓ kiyatların sayısını zeedeletti yeni ‘Gagauz atasözleri’ kiyadı. Bunun için ‘Lafedelim Büük Allaylan’ programasında annattı kiyadın avtorlarından birisi: Oxford Universitetinin aaraştırmacısı D. Doç.Tudora Arnaut.
Onun laflarına görӓ, gagauz söleyişlerini o başladı toplamaa taa 1994-cü yılda, açan işlӓrdi Komrat Devlet Universitetindӓ: ‘Ozaman biz studentlӓrlӓn barabar küü-küü toplardık söleyişleri. Sora da Ukrainada bu işi ilerlettim. Benim arhivimdӓ başka janralarda da material var, ama söleyişlerdӓ sansın taa çok dedelerin ruhu var’.
Bu kiyadı Tudora Arnaut Türkiyeli bilim adamı Bülent Hünerliylӓn birliktä hazırladılar. Bu gözäl kiyat tiparlandı Yurtdışı Türklӓr hem Senselä Topluluklar Başkannıın finans yardımınnan.
Foto: YTB
